GENERELT

LDAP-basen skal innehalde opplysningar naudsynt for autentisering,
tilgangsstyring for nettverksressursar (epost, diskusjonslister,
internettilgang og filområde) og forholdet mellom klasse/elev/lærar.
Andre attributtar for dei ulike elementa i treet skal også lagrast, så
som epostadresser, telefonnummer, foresatte og personnummer (viss
Datatilsynet tillet det).

NASJONAL STRUKTUR

Eit effektivt driftsopplegg krever at kvar skule har sitt eige
namnerom slik at ein ikkje får namnekollisjonar når ein går over til
meir sentral drift.  Ved å bruke ein hierarkisk modell oppnår vi dette
ganske enkelt.  Ein hierarkisk modell gjer det også mogleg å delegere
ansvar for å halde ei undergrein oppdatert.

Det er naturleg å bruke same organisering som det er i det offentlege
allereie, med andre ord ei inndeling i fylke og kommunar.  Å kutte ut
fylkesdelen fungerer ikkje sidan fleire kommunenamn vert brukt i to
fylke (Sande i Vestfold og Møre og Romsdal, Bø i Telemark og Nordland,
m.fl.).  I Oslo deler vi inn etter bydel sidan det fylket ikkje er
delt inn i kommunar (Kommentar: Dette er kanskje ikkje praktisk, sidan
alle skulane i Oslo vert styrt sentralt.)

NAMNEKONVENSJONAR

Toppen av treet er "o=skolelinux,c=no".  Når/viss Staten kjem inn og
vil ta over drifta av opplegget vårt, kan det vere naturleg å bytte ut
toppen av treet med noko anna.  Vår programvare bør vere budd på at
noko slikt kan skje.

Neste trinn er "l=fylke".  Vi brukar dei vanlege tobokstavs-
stuttingane for fylkesnamn, "mr", "sf", "nt", "vf" osv.  Merk at Oslo
er "oslo", ikkje "os".

Så kjem "l=kommune".  Namnet vert skrive fullt ut.  Det går fint å
bruke norske teikn og blanke i dette namnet.

Til sist kjem "o=skule".  Namnet på skulen må vere unikt innanfor
kommunen, og det er opptil kvar enkelt skule å velje namnet som vert
brukt her.  Eg synest det vil vere naturleg å skrive namnet fullt ut,
men droppe "overflødige" ord.  T.d. "Hole barne- og ungdomsskole" vert
til berre "Hole", "Hole BU", eller kanskje "HBU" om det er den vanlege
lokale stuttinga.

AVBILDNING TIL EPOST-ADRESSER

Overgangen frå ein Distinguished Name[1] i LDAP til eit epostdomene er
rett fram.  Norid tilrår at æøå vert gjort om til aoa.  Tilsvarande
vert gjort for bokstavar med aksent, c cedilla o.l.  Blanke vert gjort
om til bindestrek, og punktum vert fjerna.

[1] Distinguished Name (DN) er termen som vert brukt om unike
    objekt-IDar.

Nokon døme:

  Eining:  Ytre Herøy Ungdomsskule, Herøy kommune, Møre og Romsdal
  LDAP DN: o=YHU,l=Herøy,l=mr,o=skolelinux,c=no
  Domene:  yhu.heroy.mr.skolelinux.no

  Eining:  Oslo Katedralskole, St. Hanshaugen-Ullevål bydel, Oslo
  LDAP DN: o=Oslo Katedralskole,l=St. Hanshaugen-Ullevål,l=oslo,
             o=skolelinux,c=no
  Domene:  oslo-katedralskole.st-hanshaugen-ulleval.oslo.skolelinux.no

Viss vi kuttar ut inndelinga i bydelar i Oslo, og leiinga på
Katedralskolen ønskte det, kunne vi i staden få:

  Eining:  Oslo Katedralskole, Oslo
  LDAP DN: o=Katta,l=oslo,o=skolelinux,c=no
  Domene:  katta.oslo.skolelinux.no

Domenet kan uansett overstyrast eksplisitt med attributten
"associatedDomain".



TREET FOR KVAR SKULE


Toppnoden for skulen består av
  objectClass: organization
  objectClass: lisSchool
Dette omfattar verdiar som postadresse, gateadresse, telefonnummer,
faksnummer osv.

Under toppnoden finn vi fire greiner.

GREIN 1: organizationalUnit: Elev

I denne greina finn vi eitt objekt for kvar elev ved skulen.  Ein elev
er sett saman av klassane

  objectClass: inetOrgPerson
    ... inneheld attributtar for namn, adresse, telefonnummer osv.

  objectClass: posixAccount
    ... inneheld all informasjon som skal til for å autentisere ein
    brukar i eit POSIX-miljø (i praksis Unix).

  objectClass: lisPerson
    ... inneheld 
    emailAlias:  gyldige epost-aliasar, "k.t.homme", "kjetil.t.homme", 
                 osv.
    owner:       referanse til læraren som er klasseforstandar.
		 vedkomande er autorisert til å endre verdiar i dette
                 objektet.
    dataOfBirth: fødselsdato
    uniqueIdentifier:
                 personnummer eller annan identifikator gyldig også 
                 utanfor denne skulen.

Kvar elev kan ha eitt eller fleire lisKinship-objekt under seg.
Attributtane i lisKinship er "kinship" og "kin".  "kinship" er namnet
på forholdet ("mor", "far", "tante", "verge"), "kin" er ein referanse
til ein annan person i LDAP-treet.  Sidan det er kinship som vert
brukt for å lage eit unikt namn for dette objektet, kan ein elev kun
ha éi tante registrert på seg.


GREIN 2: organizationalUnit: Tilsett

I denne greina finn vi alle tilsette på skulen.  Dei tilsette er sett
saman av same objektklassene som elevane, med berre små forskjellar i
semantikken.  dateOfBirth er valfritt for elevar også, men det er
mindre sannsynleg at dette vert lagt inn på tilsette.  "owner" vert
sannsynlegvis heller ikkje brukt, men kan brukast for å la ein
avdelingsleiar manipulere sine undersåttar.


GREIN 3: organizationalUnit: Kontakt

I denne greina finn vi personopplysningar om alle eksterne
kontaktpersonar.  Greina finnest hovudsakleg for å ha opplysningar om
elevane sine foresatte, men det er fritt fram å leggje inn andre
(seljarar, sensorar osv.)  Praktisk som ei felles adressebok for
skulen.  "objectClass: inetOrgPerson" vert brukt.

  

GREIN 4: organizationalUnit: Klasse

Her ligg alle klassene/faga registrert.  I småskulen vil ein vanlegvis
ha berre ei klasse ("2B"), kanskje to ("2B" og "2B gym").  Generelt
har ein eigne "klasser" for kvar undervisningsaktivitet der anten
elevar eller lærar er forskjellige.

Kvart klasseobjekt er av typen "objectClass: lisClass".  Attributtane
er:

  owner:        Ansvarleg lærar (skrivetilgang til objektet)
  teacher:      Peikar til lærar som er med på denne undervisnings-
                aktiviteten
  student:      Peikar til student som er med på ...
  timeAndPlace: Spesifikasjon av tid og stad for aktiviteten
  seeAlso:      Peikar til klasseobjekt som elevlista skal kopierast
                frå.

Alle desse attributtane er valfrie og kan ein eller fleire verdiar.
Merk at ein lærar må leggjast inn som "teacher" sjølv om han står
oppført som "owner".